alithadialdimograty

منتدى الفكر الاتحادى الحر منتدى يعنى بطرح الفكر الاتحادى وتفعيل مشاركة الاعضاء فى تطويره وتنقيته من الشوائب ونشره
 
الرئيسيةالرئيسية  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 اوبريت سودانية -----للشريف زين العابدين الهندى

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
abdallaalshreef



المساهمات : 84
تاريخ التسجيل : 22/08/2012

مُساهمةموضوع: اوبريت سودانية -----للشريف زين العابدين الهندى    الخميس نوفمبر 08, 2012 6:45 pm

بسم الله الرحمن الرحيم
اوبريت سودانية --------- للشريف زين العابدين الهندى
مقدمة :
هذه اوبريت سودانية ..أنشودة الهجرة والاغتراب ..أغنية حب وتصد وعرفان , حداء الذين خرجوا من اجل اوطانهم فالتصقت بأرواحهم ووجدانهم وظلت تتفتح صورا يعيشونها بأعماقهم ..ترطب لهم هجير الغربة وتحدوا لهم ركب العودة الحثيث ..انها ليست من تأليف احد انما هى مشاعر قوم وموال امة ..انها ليست غناء ..انما هى عزف هادئ رزين على اوتار الحقيقة .. انها ليست ذكريات انما هى دفق حى لواقع ملموس معاش مستمر ..انها ليست رثاء انما هى ملحمة الحماس اللاهب لانطلاق الشباب المغذى بحكمة الشيوخ .انها عروة وثقى تشد اهلها برباط محكم متين فلا يتحطمون للمحن وانما يحطمونها ولا يتراجعون للعقبات ولكن وانما يجتازونها ولا يضعفون للصعاب وانما يطوعونها ... انهم جيل ضرب له موعد ثان مع القدر وتعين له لقاء جديد مع التاريخ والحرية ...انهم جيل البطولات وجيل التضحيات وجيل الفداء ..انها من تأليفهم جميعا فى عزف موقع من سيمفونية الخلود مع اوركسترا الحق والصدق فى مهرجان الشروق الجديد بعد ليلهم الطويل الوبيل ......
..............................................................

اوبريت سودانية
مساهر ليلك الطول نجومه هجوع
وغرقان قمره فى جوه السحاب مصروع
بصارع فيك ظلام تمن سنينه سبوع
وأراقب فجرك الآذن زمانه سطوع
وشايلك سيف نصر لا يطيش ولا هو بزوع
ورابطك فى حشاى من العطش والجوع
واسقيك منى دم ودموع
واوقد لك جحيم وشموع
*****
واقش منك دموع الضيم على خدودك بتتحدر
واقبل فيك جبين مرفوع كراية نصر
وبيرق عزة رفرف فى ركاب فاتحين
واغسل لك تراب الهجرة بالليدين
ويجيك المجد مدخور لك سنين ودنين
من حبوبتك الوقفت ترد الدين
وتطرد حملة الباشا ومع الغازين
حليله مهيره كاسرةالتوب وحد الزين
ومن جدك بكبر فوق خيل سرغام
ودافن ضهره فى كررى ومتكتل ركاب ولجام
وشايل فى ايده سيف العود
يبعج بيه كبدة وهام
وقبال دمه ما يرشح مع البارود
يكون شتت عليك أجسام
أجسام من غزاة ما قدروا يسبوك
ولا كشفولك المقنع ولا فى شينه ختوك
ولا خلولك احداقهم ولا هم قدروا يدنوك
ومما فاتو لى هسع بدوروا رضاك وبطروك
*****
وكيف بنساك وذكراك لى دماه عروق
ومما الهجرة حلت ليهو لابسك انت عمه وطوق
وممزوج فيك ممازجة اللسان للضوق
*****
بشوفك فى عيون النيل وفى الاطفال
وفى تاريخك الاخضر على الاجيال
وفى بحر الدمى اللسع بجم سيال
وفى مستقبلا واعد كبار وعيال
بشوفك بشرى فيك شقق جبال ورمال
وفى حدقاته مفتوحات ثلاثة ليال
بترسم لى طريق نجم العشا الولوال
وتكشف فيك اسرارا كتار وأهوال
*****
وبلقاك حتى فى رمش الغريب الضال
مهموم فى اليمن لا الحامدى لا السلال
وبلاقيك فى الخليج مشرورة حالك حال
ويشكل فيك يبيعوك بالذهب والمال
*****
فلذاتك مبعثرة فى البلاد مأجورة
تبنى على الرمال احلامها ثم قصورها
خلوك سايمة فى ايد الطغاة مأسورة
عشان ما يسلموك الحلبى روب فى كورة
******
أبشرى نحن لسع فى الخلا مرابطين
نحن عقاب عهود أنصار مع مهاجرين
ونحن سهارى ما بنعرف غمضة عين
ونحن فداك نذود عنك بقالنا سنين
حالفين بيك قسم غالى وعزيز ويمين
ما نضوق راحة لا نشوف زوجه لا والدين
ولا ندفن رؤسنا على الرمال خايفين
حتى نوقى من اشلانا اعلامك على القصرين
وحتى نسوى للقصفوك مقبرتين
زى ما صنعا تاره على الالف ألفين
وحتى نكسر القيد وينقسم نصين
ويكون عيدنا الكبير فى مقرن النيلين
*****
وما بنساك عشان بطراك فى الازمان
قريب منك قرابة الحدقه للانسان
وجايل فيك جولة الدم على الوردان
وقيمتك عنده زى قيمتك معاه زمان
******
بعيشك هضبه بتشارف تلال قيسان
وبحياك موية فى دارفور نيل عطشان
وبديم فيك من سنار ترع خزان
ويتدفق خيره عند الرهد بستان
وبقول للدندر الغاضب كفاك جيشان
وبسهر لى وليداتك يعشى الحارى والجيعان
.*******
منو الزيك ولد واستالد الاولاد
منو الزيك بجيبهم ديمة عشرة انداد
منو الزيك ببز الدنيا موية وزاد
منو الزيك ضروع وزروع ونيل مداد
منو الزيك بطانه وغابة دون حداد
منو الزيك سهول وادى وجبال أوتاد
منو الزيك اصل موروث من الاجداد
منو الزيك جراتق دم قدام وجداد
قشى الدمعة يابت الرجال ما بحكموك اولاد
*******
بت الحر وأم الحر واخت الحر
وست الضنبو مردوم بى وراهو يجر
ست الفى الخشش من العصير بنتر
ست الخيل وست الفى القلوب بنقر
وأم الحلفو بيك وبى العذاب المر
ما بختولك الشينة ومناحة كر
******
أولادك فضلة الموت وبتلجوبو
ودايما سيرتو فى لسانهم وبتسلوبو
وزرعك من زمان المهدى طارح دوبو
واحدين بحصدوه وواحدين بفكو دروبو
*******
تيلادك مسكر فى الخزن محروس
هجليج واندراب ومهوقنى وأبنوس
ومن صمغ الهشاب سوى السنط ترتوس
ومن شدر التبلدى الموية كوس فى كوس
ومن ضل النخيل الشمس دايره تكوس
وفى حرب المطر فرع الحراز مدروس
ومن شوك السدر جيش السلم هكسوس
ومن زهر التبر البادية باقية عروس
وبى توب البرم سوى الطلح ملبوس
ومن شدر الاراك عطر الدعاش مبثوث
ومن سيف العشر جيش هكس صار مهروس
والدوم واج بقيف للاتبروى خروس
**********
فيك الفيل وفيك العنزة والجاموس
وفيك التيتل الليات قرونه تروس
وفيك الاصلة والدابى وأب درق وحروس
وفيك أسد العرين رب العراك والدوس
وفيك ريل الوادى البى تاله راتع يجوس
وفيك صقر الكواهله العينو كالفانوس
وفيك فهود وفيك نمور وفيك طاؤوس
وفى نيلك عشارى يشيل من الجاقوس
*******
وفيك الابيض الماش منطرح ما بقيف
وفيك رهد المفازه الوعدو ما خليف
وفيك الاتبراوى الفى الشواطئ مخيف
وفيك الدندر البهجم هجمة السيف
وفيك الباسلام فى الفشقة عامل هيف
وفيك سيتيت منبت من قناهو صريف
وفيك القاش يورى الرعده والصاقعة الدوداو كيف
******
وفيك بحر الجبل حاقب عرى الجاف
وفيك بحر الغزال والجور وبحر زراف
وفيك سوباط زى دبيبا خاف
وفيك بحر العرب مليان نعام وزراف
وفيك بحيرة قال (نو ) سيدها ما الاسلاف
وفيك خور اب حبل شاقى البلد كشاف
وفيك تمت العظيم شايل الكليت والشاف
وفيك خور الدهب ذو الذكرى والاعراف
وعندك مقرنا حرم سواك ما انشاف
*******
وعندك الف خور فى الوادى والفين رافد
وحسبان الجزاير والجروف ما وارد
والنبرو الحنين لى عودو سيدو يقالد
والساقية الحنين توريقها باكى وساهد
والبلدات ونجاضات حليلة فايد
وسمسم وام صقور وسهل قبول ودزايد
وصقيعة ام بليل براقها قايم وقاعد
والمطر البكب اربع شهور ويدارد
وفيك قدنبلية وكمبو سته الوارد
وام سينات تغازل دوكة ماشه تحادد
الكفاى بقول للفشقة بهمك شارد
كونو الفاو بقت ترع وجناين وموارد
*******
وفى غروبك ربوع خصبة وتبر مبهول
ووديان من عقيق مغسول مطر وسيول
وكثبان تابه بتطرز حواشى سهول
تجود بالكركدى وصمغ الهشاب والفول
وتدى القنقليس طول الشهور والحول
وفيك حفرة نحاس وابو تولو غير مصقول
والعيش والسماسم والصمغ والكول
والتور والخروف والناقة والكاتول
على دينار كسب ليها الشرف والطول
ابو زكريا أداب العصاة زول زول
من وداى يكربت فى ربوعها ويجول
لى الكفرة وصحاريها العجاف الهول
********
وجبل مرة الشمخ جايب مناخ لبنان
وفجر ينابيعه العجاب بستان
طارح عنبه والزيتون مع الرمان
وجاب من يافا تفاحا كبار ومكان
********
ومن مليط مكربت شاقى دار الريح
نازل بالرا أم فتنة بتسر وتريح
واتباشر على الطمباره صوتها يصيح
ونوخ تقلى فى السهل الكبير وفسيح
******
ومن تقلى انبرم شايل جبال النوبه
عامر قلبه بى برشم عريس الحوبه
جلجال والاحيمر نارهم ادفوبها
وين مجذوب وشامى الحارة بتسلوبها
******
وفى شروقك ربى العنافى قاطع تيهو
وفى ضهره الدغم دوباى حرارتو وتيهو
وفى الشبرية راكبه حمامة بتغنيهو
مسدار اب شوارب ياخدو ويديهو
*****
أمانة عليك رفاعة اب سن بتنسى الكاعة
يوم اكلت كباد ساكت رخم وضباعه
يوم محمود وناس عوض الكريم سمساعه
واقفين فى الشمس دايرين يغطوا شعاعها
فى ضحوة عجاج وسيوفهم اللماعه
ياكلن فى التراقى ويقطعن فى ضراعها
********








عدل سابقا من قبل abdallaalshreef في الجمعة نوفمبر 09, 2012 6:32 pm عدل 1 مرات (السبب : متابعه)
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
اوبريت سودانية -----للشريف زين العابدين الهندى
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
alithadialdimograty :: الفئة الأولى :: المنتدى الأول-
انتقل الى: