alithadialdimograty

منتدى الفكر الاتحادى الحر منتدى يعنى بطرح الفكر الاتحادى وتفعيل مشاركة الاعضاء فى تطويره وتنقيته من الشوائب ونشره
 
الرئيسيةالرئيسية  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 اوبريت سودانية -----للشريف زين العابدين الهندى --2

اذهب الى الأسفل 
كاتب الموضوعرسالة
abdallaalshreef



المساهمات : 84
تاريخ التسجيل : 22/08/2012

مُساهمةموضوع: اوبريت سودانية -----للشريف زين العابدين الهندى --2   السبت نوفمبر 10, 2012 2:38 pm

[b][center] اوبريت سودانية -2-
يالمعزوزة بى دمانا وعضام ابواتنا
عارفنك مقريفة لى شراب قهواتنا
زغردى يا ام شيوم خلى الندق نحساتنا
ونحاسب عقاب الجاتنا والماجاتنا
ونحاسب عقاب الجاتنا والما جاتنا
****
هسع قومى سوى السيرة جرى النم
خلينا النهشك فيك و نملاك دم
ندفن لك شققك شور عضام ولحم
ندفق فيك نحيرا لا وقف ولا جم
نشبع لك صقور وضباع وطير ورخم
لا من ترضى كيفك ودور هناك ينتم
*****
شوفى معزتك كيفن عزيزة علينا
وشوفى عزمنا للحمل الوقف راجينا
شوفينا بنتر ولا بنكف الشينة
شوفينا بندكك ولا ما هامينا
شوفينا بنبشر فيك طوال ايدينا
ولا نغطى بالطين والعجين اضنينا
*****
وفى شروقك ارض مليانه خير ومعادن
فيها السارح الناشق وفيها الساكن
وفيها المن حلايب جاى غاشى سواكن
وفيها الاركويت نسام اراك وجناين
وفيها غزال جبيت وقل قصاد الشادن
ومن صمد انطرح اربعات بيعاين
*****
وناس اوشيك يخنقو فى الربابة ويغنو
واوهاج سل شوتالو وبكلو يسنو
تمباك الدمك جو الكدوس حاشنو
جبنات يا بنات هريوا قامن وجنو
دبايوا اوجات كيها يا أدروب ابوك كيفنو
روح تندلاى ولا الصهب فاتنو
قالوا الليله هبباى بركة زايد جنو
ناس باكاش وحامد فى اروما استنو
*******
الكور دلو والمربيت تمشى الوادى
خت الدرقة والهارى السنين بى غادى
وادنى الانقلت قرب علينا ينادى
والهوشاب برد بروى الغليل الصادى
فى حلفا التقيت بالاوس وأولاد نافع
سلام اولاد ركاب اول بناة للجامع
درب الخزرج الضوا العتامير ساطع
لى برى المحس فى توتى ليهو مشارع
*****
وفى شمالك نخيل باسق يداعب الريح
بقول للبركل الشامخ كفاك تبريح
ات عارف كلامى وراى بالتلميح
جيب رايا قديم بيهو بتفيد وتريح
قش دمع السواقى البى العذاب بتنيح
واطرى العضام تحتك تنين وتصيح
******
شوف النيل مكوع شايل اولاد شايق
رقصبوا النسيم طربان مصفى ورايق
شاقى الباوقة لى مروى وكريمه يعانق
اكرف فى دعاشا بوح جروف وحدايق
*******
سلام يا خالى كيف امسيت فى جناتك
فى روعة فراديسك وطيب نسماتك
دارك عامرة مفتوحة وضيوفك جاتك
هاشى وباشى يندى عطاك بى راحاتك
*******
عتمور اب حمد قطع الوهاد والصى
حارساك بى حزام صنعو الكريم الحى
دفن فى بطنو اسرار وطواهن طى
لما يجيها بى الحامداب كهارب وضى
******
اولاد جابر السوو الكتاب نبراس
عمروا الجو تلاوة وغر قولا الساس
نشروا الكون مصاحف وعلموها الناس
سلام يا شيخ حمد اسد العرين والباس
سلام درع البلد ليهم بقيت متراس
سلام نور العلم تقابة فى كدباس
********
قول حاس دور واقيف زنهار
ورجع لى الزمن بى الشوكة والشنكار
أنفث زى لهيب الشهدا باستنفار
وشيل تعظيم سلام بلد الحديد والنار
يوم الشهداء بى دماهم لووكى حكار
وعزوك بالنفوس لامن بقيت تذكار
( انا سودانى ) ورواها العطبراوى شعار
******
مر بالدامر البى ذكرو عز وجل
واتنوخ فسيح وأدى المجاذيب طله
شوف النار متلعبة فى المساجد ولا
مات نور الضيا وجات بعده نار الجلة
شوف المصحف الاربع قرون بتدلا
ماسك وردو أم سحرته عين خلق الله
******
سلام يا المك نمر اداب الترك فى شندى
سلام اولاد جعل اهل المكارم عندى
اهل الدروع والخيل الكلهم جرقندى
ولاد عبد الله فيك هازين صوارم الهندى
******
اطرى السناجك وواقعة الخشخاش
واطرى النحاس وكتين يزم بطران
والعفريت بحمحم فى الرباط طربان
ونادى اولاد جعل والنجمجم القرمان
والخيل عركسن واتروقن ريقان
وصقر الجو بحلق فى السما جيعان
يا الكدك بدور كبدة وكلى ومصران
******
نادى المك نمر معلم أباة الضيم
شاوى الباشا شى خلاى جناهو يتيم
ودفتردار بجك عند المتمة زميم
ارفع صوت لعل الناس يبقى فهيم
ارفع صوت خلاص شرطنا شرب الهيم
وكاد عاقلنا يصبح من سكاته بهيم
******
حبابك عشرة يا بت مقرن النيلين
حبابك يا ام عجن بعد العديل والزين
حبابك يا المحكره فى المشاعر والفؤاد والعين
حبابك يا المغسلة بى طهور مويتين
*****
حباب اهلك بلاعبو الموج مع البردين
حبابهم كتفوا أبو طليح على القنين
حباب قصرك ضبح غردون من الاضنين
حباب الخندق العجن الجلود بالطين
******
حباب المهدى فيك كبر حرارة ودين
حباب اسد العرين عبد الله ود تور شين
حباب النور عقيد الخيل عقود الشين
عنقرة المعزة الاصلو ما بتلين
******
حباب الزاكى أداب النقز فى الحين
حباب ود النجومى القبره فى توشكين
حباب عثمان سواكن دقنه فى الدورين
حباب يعقوب حباب محمود وشيخ الدين
سلام يا البقعة مبروكة الاله والدين
حباب الحرروك لا انتماء لا دين
حباب السودنوك خلوك سمارة وزين
حباب الازهرى النكس زرا العلمين
حباب الراية هفهافة وتكيل العين
قولوا معاى تبارك اقول دقر يا عين
وزغردى يا ام رشوم وقولى البطان وين وين
بركز لما سياطهم تبيد وتلين
ولما يشوفوا قطع ايدى بالسكين
ولما تقول حمامة كفاك دقر يا عين


عدل سابقا من قبل abdallaalshreef في السبت نوفمبر 10, 2012 5:31 pm عدل 1 مرات (السبب : متابعة)
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
اوبريت سودانية -----للشريف زين العابدين الهندى --2
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
alithadialdimograty :: الفئة الأولى :: المنتدى الأول-
انتقل الى: